Era Val d’Aran a participat ena 19au Euskal Denda
Deth 5 ath 8 de deseme era Val d’Aran siguec presenta ena 19au edicion dera hèira d’artesania Euskal Denda a on participèren lèu 50 mestieraus. Occitània siguec eth país convidat, e per açò era Val d’Aran participèc damb diuèrsi mestieraus. En totau 4: Talhèr Bausen (téxtil), Ariza (pèira), Paèrs Bausen (paèrs) e Pcorfer (husta).
Euskal Denda ei ua hèira a on participen mestieraus provenentes d’Araba, Benafarroa, Bizkaia, Gipuzkoa, Lapurdi e Nafarroa, e que cada an conviden a ua region. Pendent er eveniment se desvolopèren nombroses activitats ludiques que dinamizèren eth recinte heirau, en tot perméter ath visitant interactuar damb eth collectiu mestierau.
Dera man d’Arbaso, organizadors d’aguest eveniment, era Euskal Denda s’afrairèc, ath delà, damb era cultura occitana motiu peth quau se convidèc ara Val d’Aran.
“Era artesania dera Val d’Aran ei fòrça importanta e se tròbe en un continu auge. Er afrairament damb eth País Basc permet dar a conéisher aguesta peculiaritat que definís ua part dera cultura aranesa, restacada damb Occitània”, comente era conselhèra de torisme, comèrç e consum, Anna Diaz.